1 Qanday baxıtlı mınaday adam:
Napa'klerdin' ma'sla'ha'ti menen ju'rmeytug'ın,
Gu'nakarlardın' jolına ayaq baspaytug'ın,
Surbetlerdin' arasında otırmaytug'ın.
2 Al ol Jaratqan İyenin' ko'rsetpelerinen ra'ha'tlener,
Ku'ni-tu'ni ko'rsetpelerinin' u'stinde oy juwırtar.
3 Ol ag'ın suw boyına egilgen miywe ag'ashına megzer,
Miywesin o'z ma'wsiminde berer,
Japıraqları quwrap qalmas,
Ol ne islese de, tabısqa eriser.
4 Al napa'kler bolsa bunday emes,
Olar samal ushırg'an qawıqqa uqsar.
5 Sonın' ushın a'dillik bolg'an jerde napa'kler tura almas,
Haqlardın' ja'miyetinde gu'nakarlarg'a orın bolmas.
6 Jaratqan İye haqlardın' jolın gu'zeter,
Al nahaqlardın' jolı o'limge jetekler.
http://ibt.org.ru/ru/text?m=KRKL&l=Ps.1.1.1&g=0